 (02-12-2009)Wafdi uu hogaaminayo kuxigeenka wakiilka qaramada midoobey u qaabilsan arrimaha Soomaaliya Mr Charles beti ayaa maanta soo gaaray, iyagoo kulamo kula qaatay xarunta madaxtooyada R/wasaaraha iyo golihiisa Wasiirada. Kulan saacado qaatay oo wafdiga Qaramada midoobey iyo golaha wasiirada wada qaateen ayay uga hadleen sidii loo dar dar gelin lahaa taageerada qaramada midoobey siiso dowladda, isla markaana la de-dejiyo qorshaha xafiisyadii UN-ka loogu soo rarayo magaalada Muqdisho. Wasiirka qorsheynta iyo iskaashiga caalamiga Mr C/raxmaan C/shakuur warsame ayaa ka warbixiyay booqashada wafdiga qaramada midoobey, isagoo sheegay in ahmiyada uu ahaa sidii looga baaraan dagi lahaa kulan dhowaan ka dhici doona magaalada Jeddah ee boqortooyada sacuudiga. "Anaga iyo wafdiga qaramada midoobey waxaan isla meel dhigeynay, qodobadii iyo ajandaha lagula hor tagi lahaa shirka kooxda xiriirka caalamiga ee 17-ka bishan furmaya"ayuu yiri Mr C/raxmaan C/shakuur. Sidoo kale waxaa uu sheegay in kulanka ay yeelan doonaan kooxda xiriirka caalamiga ay ka filayaan in ay ka soo baxaan natiijooyin wax ku ool ah oo ka duwan kuwii horay ugu soo bixi jiray. Booqashada wafdigan qaramada midoobey ayaa ahaa kii labaad oo ay Muqdisho ku yimaadaan muddo labo bil gudahood, iyadoo wafdiga ay wali u kuur galayaan xaalada ammaan ee magaalada, iyagoo qorsheynaya in ay xafiisyo ka furtaan. Dalkanews.com Muqdisho | 
Mainmenu
